Пад Гомелем жыхары вёскі спрабуюць злавіць збеглага дзікабраза. Жывёла блукае на волі ўжо некалькі месяцаў
Фото: fishingby
У беларускай вёсцы Зябраўка з’явіўся незвычайны жыхар — вось ужо два тыдні тут назіраюць за дзікабразам, які свабодна перамяшчаецца па населеным пункце.
Гісторыя пачалася з таго, што мясцовы жыхар Дзмітрый Астапенка выявіў няпрошанага госця ў сябе на двары, піша Fishing.by.
«Быў збянтэжаны такой сустрэчай, яшчэ й на мяне кідацца стаў. Цяпер дзесьці ў кустах сядзіць, не хачу палохаць пакуль, але не маленькі, знайсці можна. Прыходзіць па начах», — падзяліўся мужчына.
На думку мясцовых жыхароў, гэты экзатычны звярок — уцекач з аграсядзібы «Конскі востраў», што размяшчаецца ў вёсцы Гранаўка за 40 кіламетраў.
Пра тое, што адтуль збегла пара дзікабразаў, СМІ паведамлялі яшчэ летам. Тым не менш, калі ім тэлефанавалі, уладальнікі сядзібы адмовіліся прызнаваць сваю адказнасць за звера і лавіць яго не хочуць.
Цяпер мясцовыя жыхары самі заклапаціліся лёсам калючага госця. Яны разлічваюць злавіць дзікабраза і да наступлення халадоў знайсці для яго бяспечнае месца.
